കാഴ്ച

മാനസ വാടിയില്‍ മോഹം വിടര്‍ന്നപ്പോള്‍
ഒന്നാം കിളിക്കുമേല്‍ കണ്ണുവച്ചു.
വര്‍ഷം കഴിഞ്ഞപ്പോള്‍ വാസന്തം വന്നപ്പോള്‍
രണ്ടാം കിളിക്കൊപ്പം കൂട്ടുകൂടി.
ആ കിളിയെന്നോ പിണങ്ങിപ്പറന്നപ്പോള്‍
മൂന്നാം കിളിക്കൊപ്പം കൂടൊരുക്കി.
ഇന്നാ കുടിലിന്റെ പൂമുഖത്തിണ്ണയില്‍
നാലാമത്തെക്കിളി കാത്തിരിപ്പൂ
നാരായണക്കിളീ നീയാരേ തേടുന്നൂ
നിന്‍ ദേവന്‍ വൃന്ദാവനം വെടിഞ്ഞൂ.

മാനസവാടിയില്‍ പൂക്കള്‍ നിറഞ്ഞപ്പോള്‍
ചെമ്പനീര്‍ പൂവിനെത്താന്‍ ഭ്രമിച്ചു.
മുരളികയൂതിയാ കാര്‍വര്‍ണ്ണന്‍ നിത്യവും
ആ പൂവോടു മാത്രമായ്‌ സല്ലപിച്ചു.
ആ പൂ കൊഴിഞ്ഞിട്ടോ ആരോ നുകര്‍ന്നിട്ടോ
ഇന്നു മറ്റൊന്നിനെ തേടിടുന്നു.
നീലഞ്ജനപ്പൂവേ നീയാരേ തേടുന്നൂ
നിന്‍ ദേവന്‍ ഏതോ പൂവില്‍ ഭ്രമിച്ചു.

വൈകിയാണെങ്കിലും ഞാനെന്റെ ജാലകം
എന്തിനോ മെല്ലെ തുറന്നീടവെ
വെയിലേറ്റു വാടിയ പൂവുകളൊക്കെയും
ആരെയോ ധ്യാനിക്കയായിരുന്നു.
തളിരിട്ട നാട്ടുമാവിന്നിളം ചില്ലയില്‍
പാടാതെ വന്നൊരു കിളിയിരുന്നു.